රටේ සංවර්ධනයට උතුර-දකුණ කියලා වෙනසක් නැහැ! UNP-TNA යහපාලන ආණ්ඩුවෙන් උතුරට කළ දෙයක් නෑ! අග්‍රාමාත්‍ය මහින්ද රාජපක්ෂ දෙමළ මධ්‍යයට කියයි…

July 1, 2020 at 10:19 pm | by emanisa.lk

රටේ සංවර්ධනයට සහ ජන ජීවිතය නැංවීමේ ව්‍යාපෘති ක්‍රියාත්මක කිරීමේදි උතුර සහ දකුණ කියා වෙනසක් නැතැයි අග්‍රාමාත්‍ය මහින්ද රාජපක්ෂ පවසයි.

අග්‍රාමාත්‍යවරයා මේ බව සඳහන් කර සිටියේ අද (2020.07.01) පෙරවරුවේ අරලියගහ මන්දිරයේදි දමිළ මාධ්‍යවේදින් හමු වූ අවස්ථාවේදිය.

උතුරු -නැගෙනහිර පළාත්වල 1977 වසරෙන් පසුව, 2010-2015 තම රජය පැවති සමයේදි දැවැන්ත සංවර්ධන ව්‍යාපෘති රැසක් ක්‍රියාත්මක කළ බවද සිහිපත් කළ අග්‍රාමාත්‍යවරයා එම පළාත්වල ජන ජීවිතය යහපත් තත්ත්වයට පත් කිරීමට සැලැස්මකින් යුතුව සිය ආණ්ඩුව කටයුතු කළ බවද සඳහන් කළේය.

තම රජය සමයේ සිදු කළ සංවර්ධන ව්‍යාපෘති හැරුණු කොට පසුගිය එජාප-දෙමළ සන්ධාන යහපාලන රජය උතුරු-නැගෙනහිර ජනතාව වෙනුවෙන් කිසිදු සංවර්ධන ව්‍යාපෘතියක් ක්‍රියාත්මක කර නොමැති බවත් උතුරේ ජනතාව වෙනුවෙන් පෙනි සිටිනවා යැයි කියන දෙමළ ජාතික සන්ධානය පවා එම ජනතාවගේ සැබෑ ප්‍රශ්න වෙනුවට දේශපාලන වාසි ලබාගැනිමේ අරමුණින් පමණක් කටයුතු කළ බවත් මෙහිදී අග්‍රාමාත්‍යවරයා අවධාරණය කළේය.

එම ජනතාව මුහුණදෙන පානීය ජල ගැටළුව විසඳිම සඳහා තම රජය ප්‍රමුඛතාව ලබාදෙන බවද සඳහන් කළ අග්‍රාමාත්‍යවරයා වැඩිදුරටත් කියා සිටියේ මේ වන විටත් ඒ සඳහා සැලසුම් සකස් කර ඇති බවයි.

එමෙන්ම උතුරේ ජනතාවගේ සැබෑ ගැටළු පිළිබඳව රජය දැනුවත් කිරීම මාධ්‍යවේදින්ගේ වගකීමක් බවද අග්‍රාමාත්‍යවරයා මෙම හමුවේදි පෙන්වා දුන්නේය.

හිටපු අමාත්‍ය විනයාගමූර්ති මුරලිදරන් සිදුකළ ප්‍රකාශය පිළිගත නොහැකි බවත් ඒ පිළිබඳ මේ වන විට විමර්ශන සිදුවන බවත් මාධ්‍යවේදීන් නැඟූ පැනයකට පිළිතුරු දෙමින් අගමැතිවරයා සඳහන් කළේය.

මෙම අවස්ථාවට අමාත්‍ය ධීවර හා ජලජ සම්පත් අමාත්‍ය ඩග්ලස් දේවානන්දා, උසස් අධ්‍යාපන,තාක්ෂණ සහ නවොත්පාදන අමාත්‍ය බන්දුල ගුණවර්ධන යන මහත්වරුන්ද සහභාගී වූහ.

අග්‍රාමාත්‍ය මාධ්‍ය අංශය

 
 


Leave a Reply

Your email address will not be published.

මුල් බිස්ස