ඇඹිලිපිටිය 100 කණුව IOC ඉන්ධන පිරවුම්හලේ ඇති වූ තදබදයක් සහ ගැටුමක් අතරතුර ආරක්‍ෂාවට සිටි යුද හමුදා සෙබළකුගේ අත කිසියම් පුද්ගලයකු තියුණු ආයුධයකින් පහර දී කැපුම් තුවාලයක් සහිත ඇඹිලිපිටිය දිසා මහ රෝහලට ඇතුළත් කර ඇති බව ඇඹිලිපිටිය පොලීසිය පවසයි.

මෙම ඉන්ධන පිරවුම්හලට එදින පෙරවරුවේ ඔක්ටේන් 92 වර්ගයේ පෙට‍්‍රල් බවුසරයක් පැමිණ ඇති බව පොලීසිය කීවේය.

පෝලිමේ තිබූ වාහනවලට ඉන්ධන ලබා දී ඇති අතර සවස තුනට පමණ ඉන්ධන අවසන්වී ඇති බව දැනුම් දුන් අවස්ථාවේ ඉන්ධන ලබාගැනීමේ අරමුණින් පෝලිමේ සිටි පිරිස එකවරම ඉන්ධන පිරවුම්හල වෙත කඩාවැදී ඇත. එහිදී ආරක්‍ෂාවට සිටි යුදහමුදා සෙබලුන් කඩාවැදුණු පිරිසට මැදි වී ඇත.

ඒ අවස්ථාවේ යුදහමුදා සෙබළාගේ අත කැපී ඇති බව ද පොලීසිය සඳහන් කරයි. එම සෙබළා ඇඹිලිපිටිය කදුරුගස්ආර යුද හමුදා කඳවුරට අනුයුක්තව සිටි සෙබළකු බව ද පොලීසිය සඳහන් කළේය. සෙනග අතර සිටි පුද්ගලයකු තමන්ගේ අත කැපූ බව සෙබළා රෝහලේ දී පොලිසියට පවසා තිබුණි.