ආරක්ෂක දුබලතාම හොයමින් ත්‍රස්තවාදීන් නොරකිනු! පාස්කු ත්‍රස්තයන් සහ ඊට අනුබල දුන් අය හෙළි කරනු!-කතෝලික රදගුරු සම්මේලනය ආණ්ඩුවට අනතුරු අඟවයි…

August 13, 2019 at 9:24 pm | by emanisalk

පාස්කු ඉරිදා ප‍්‍රහාරය සම්බන්ධයෙන් මෙතෙක් යුක්තිසහගත, සාධාරණ සහ අපක්‍ෂපාතී පරීක්‍ෂණයක් පවත්වා නොමැති බැවින් දැන්වත් එවැනි පරීක්‍ෂණයක් පවත්වා වරදකරුවන් නීතිය හමුවට පැමිණවීම සිදුකරන්නැයි රජයෙන් හා දේශපාලන නායකයන්ගෙන් තරයේ ඉල්ලා සිටින බවත් කතෝලික රදගුරු සම්මේලනය නිවේදනයක් නිකුත් කරමින් කියා සිටී.

මේ වන විට කමිටු කිහිපයක් පත්කර උත්සාහ කරන්නේ ආරක්‍ෂක අංශයෙන් සිදුවූ බරපතළ හිඩැස් සඳහා වගකිවයුත්තන් කවුරුන්දැයි විමසා බැලීමට වුවත්, තමන්ගේ ඉල්ලීම වන්නේ පරීක්‍ෂණ අවසාන ඉලක්කය විය යුත්තේ වරදකරුවන්, අනුග‍්‍රහය දැක්වූවන් සහ එයට අනුබල දුන්නේ කවුරුන්ද යන්න හඳුනා ගැනීම බවත් එම නිවේදනයේ සඳහන් වේ.

අවාසනාවකට මෙන් එම කිසිදු ධනාත්මක සලකුණක් මෙතෙක් දක්නට නොමැති බව ද එහි දැක්වේ.

ජනතාව මෙම පරීක්‍ෂණවල ප‍්‍රතිඵල දැක බලාගැනීමට බලාපොරොත්තුවෙන් සිටියත් ත‍්‍රිපුද්ගල ජනාධිපති කොමිසමේ වාර්තාව මෙතෙක් එළිදක්වා නැතැයි ද එහි සඳහන්ය.

මැල්කම් කාදිනල් රංජිත් කොළඹ අගරදගුරුතුමන් ශ්‍රී ලංකා කතෝලිත රදගුරු සම්මේලනයේ සභාපති වින්ස්ටන් එස්. ප‍්‍රනාන්දු බදුල්ල රදගුරුතුමන්, ශ්‍රී ලංකා කතෝලික රදගුරු සම්මේලනයේ මහලේකම් ජේ.ඩී.ඇන්තනී ජයකොඩි කොළඹ සහයක රදගුරුතුමන්, උප සභාපති ජස්ටින් බී ඥානප‍්‍රගාසම් යාපනය රදගුරුතුමන් ජේ.වියානි ප‍්‍රනාන්දු මහනුවර රදගුරුතුමන්, හැරල්ඩ් ඇන්තනී පෙරේරා කුරුණෑගල රදගුරුතුමන්, නෝබට් එම්. අන්ද්‍රාදි අනුරාධපුර රදගුරුතුමන්, වැලන්ස් මෙන්ඩිස් හලාවත රදගුරුතුමන්, රේමන් කේ. වික‍්‍රමසිංහ ගාල්ල රදගුරුතුමන්, ක්ලීටස් සී පෙරේරා රත්නපුර රදගුරුතුමන්, ජෝශප් පොන්නයියා මඩකලපුව රදගුරුතුමන්, එෆ්. එල් එම්මානුවෙල් ප‍්‍රනාන්දු මන්නාරම රදගුරුතුමන්, නොයෙල් එම්මානුවෙල් ත‍්‍රිකුණාමලය රදගුරුතුමන් සහ මැක්ස්වෙල් ජී සිල්වා යන කොළඹ සහායක රදගුරුතුමන් යන රදගුරුතුමන්ලාගේ අත්සනින් මෙම නිවේදනය නිකුත් කර තිබේ.

  •   
  •   


Leave a Reply

Your email address will not be published. Required fields are marked *

මුල් බිස්ස